國米將同艾歷臣解約　或回歸丹麥踢波

joemalee · 發表於 2021-12-17 20:53:26

今夏歐國盃期間因心臟問題暈倒球場嘅基斯甸艾歷臣，由於安裝咗心臟除顫器，喺意大利被禁止
比賽甚至練波，雖然呢位丹麥球星同國際米蘭仍有合約，不過國米為「放生」艾歷臣，據報即將
同佢達成解約協議，畀艾歷臣喺1月份搵新球隊落班，傳聞丹麥球會奧丹斯係熱門落腳地。

現年29歲嘅基斯甸艾歷臣，近期一直喺奧丹斯跟操，呢間丹麥球會係佢青年軍時代效力過3年嘅球
隊，奧丹斯總監奧古斯天奴斯早前表示：「如果艾歷臣想再踢番波，奧丹斯當然會有位置畀佢，財
政上球隊可以放寬少少，但成個丹麥唔會有球隊買得起艾歷臣，好視乎佢可唔可以自由轉會。」意
大利傳媒指國米將同艾歷臣解約，似乎為佢重返丹麥比賽開出綠燈，但亦要睇艾歷臣仲想唔想喺最
高水平賽事效力，2間前度球會熱刺同阿積士都被傳對佢有興趣。