放學趕開工炎明熹抖夠笑番

GIRLAV · 發表於 2021-12-16 17:53:18

《聲夢傳奇》人氣王炎明熹（Gigi）及姚焯菲（Chantel）前晚錄影《勁歌金曲》，當中Gigi甫放學即趕來，準備時一臉倦容，及後拍照才「醒神」露笑容，又與Chantel講悄悄話兼鬥嘴。談到日前因身體不適而缺席2個活動，她說：「收到大家嘅關心，我冇問題，嗰日起身發現2隻眼突然腫晒，我本來係內雙眼皮，但腫到變外雙，完全化唔到妝，所以要請假。（醫生點講？）話最大機會係長期戴隱形眼鏡，搞到雙眼抖唔到氣。」又透露已完成校內試，自覺成績有進步：「聖誕假無論點都抽時間同同學玩餐飽！」

至於Chantel談及她演繹《戀愛預告》的短片成為「十大熱門音樂影片」第6位，她開心說：「多謝鼓勵我揀呢隻歌嘅人。（出騷一定唱呢隻歌？）都係，唱到好熟喇！（點慶祝？）我想食蛋糕。」