英超落重藥　球員唔打疫苗隔離要扣人工

joemalee · 發表於 2021-12-16 08:30:00

英國嘅新冠肺炎疫情嚴重，曼聯、熱刺更因為有多位球員確診，導致賽事需要改期，令英超賽會非常頭痛，英國《每日郵報》爆料，指20間英超球會正在考慮出絕招，如果球員冇打疫苗，但確診或者成為緊密接觸者，而需要接受隔離，隔離期間就要扣人工。

據悉，大部份英超球會管理層對唔打疫苗嘅球員，已經忍無可忍，認為佢哋唔止忽視個人健康，更置隊友於危險之中，有不願透露姓名嘅球會管理層向《每日郵報》埋怨，指拒絕打疫苗嘅球員太自私：「呢種行為太自私，其他球員忍夠佢哋，管理層亦都忍夠。」因此，各間英超球會計劃向唔打疫苗，而又需要隔離嘅球員作出扣薪處罰。

德甲勁旅拜仁慕尼黑中場甘美治係少有公開拒絕打疫苗嘅球員，佢早確診新冠肺炎缺陣，遭球會扣人工，英超球會似乎都想仿傚拜仁嘅做法。