東張西望│黃穎君報道曱甴屋人氣急升今午突然宣布離巢TVB

GIRLAV · 發表於 2021-12-8 17:29:20

無綫資訊節目《東張西望》日前報道大埔富亨邨曱甴屋引起公眾關注，主持黃穎君（Burmie）勇敢及專業嘅態度獲得網民讚賞，人氣急升。備受關注嘅佢突然喺社交網站宣布離巢，有指佢獲聘月薪逾6萬元嘅民政事務局媒體主任，並喺噚日（7日）正式上班。

喺今日（8日）下午，黃穎君喺社交網站上載散水餅照片，及留言宣佈離巢無綫：「好好告別，也是一種成長。怎料到有一天，我也會派散水餅，給這段美好回憶劃上完美的句號。#東張西望 #藝文誌謝謝團隊對我的愛錫及照顧，我愛你們，少少心意表達感謝之情。最幸福是親自遊走office，逐一遞上散水餅，放慢腳步跟大家聊一聊，我一直都在。#謝謝你們的祝福 #也明白我的選擇 #接受新挑戰從來不易 #感恩有你們 #離開comfortzone #teamspirit #newchallenge。」呢個PO一出，唔少網民都留言送上祝福及叫佢加油。

現年33歲嘅黃穎君，2010年參加《工展小姐選舉》並獲得冠軍，並於2012年參選港姐後入行，當時被指樣貌似謝安琪而備受關注。入行後擔任TVB娛樂新聞台主持，2019年開始加入《東張西望》擔任外景主持，追訪過唔少引起網民熱議嘅事件。除咗擔任主持之外，Burmie亦有參與劇集拍攝，最令人留下深刻印象嘅一定係《降魔的》嘅龍貓嫂。至於感情方面，佢喺2015年與《#後生仔傾吓偈》監製丘一峯結婚，及育有一子，家庭幸福美滿。另外，佢亦非常好學不斷進修，入行後喺中文大學修讀社會學碩士課程，佢亦推出過散文集《曾幾何時》和《未見》，可以話係一名才女。

喺接受傳媒訪問時，黃穎君講述自己童年係因為養家還債而加入娛樂圈，佢話喺讀緊大學嘅時候，有一日父母打電話同佢講生意失敗欠債，連交學費都出現問題，以佢當時嘅收入，要幫屋企還債同交學費係有難度。為咗幫屋企人扛下債務，佢試過一星期補習補足7日，仲要兼職做客戶服務員及司儀等等，最高峰同時打5份工。