熱刺蝕大錢　干地1月照掃貨

joemalee · 發表於 2021-11-25 20:49:23

熱刺周二(23日)公布最新一季財政報告，受到疫情、換帥同無緣歐聯等因素影響，截至2021年6月份，熱刺錄得8,020萬鎊嘅稅前虧損，球會總負債亦由6.05億鎊急升至7.06億鎊，不過主席利維就保證會繼續科水買人，畀新領隊干地1月掃貨。

上季因為疫情問題令英超閉門作賽，令熱刺總收入大跌超過4,000萬鎊，歐洲賽獎金由5,120萬鎊(歐聯)跌至2,360萬鎊(歐霸)，加上炒摩連奴同紐奴嘅賠償金額達到3,000萬鎊，令新球場落成2年嘅熱刺負債急升。

熱刺經過債務重組後，還款期長達30年，令球會仍有足夠空間動用資金買人，主席利維表示：「自從新球場喺2019年開幕後，我哋已經用咗超過4億鎊買人，買人唔係成功保證，但我哋會提升收購、訓練、球員體能同精神嘅水平，請柏拉迪斯(總監)同干地就證明熱刺嘅雄心壯志。」