艾斯高作反拒絕熱身　皇馬1月送瘟神

joemalee · 發表於 2021-11-24 21:30:55

/皇家馬德里今季喺安察洛堤執教下順風順水，目前高踞西甲榜首位置，不過近日爆出中場艾斯高「作反」消息，據報佢喺上場對CF格蘭納達一仗曾拒絕熱身，令安察洛堤臨時改變換人計劃，消息指皇馬已決定1月「送瘟神」，畀呢位西班牙中場自由轉會。

皇馬喺西甲4比1大勝CF格蘭納達，比賽後半段安察洛堤叫卡馬雲加、盧卡祖域同艾斯高熱身，但係當艾斯高得知卡馬雲加同盧卡祖域會率先入場，佢就嬲爆自己走返後備席，拒絕教練團要佢繼續熱身嘅要求。據報安察洛堤原本打算再過多陣先至換入艾斯高，不過經教練商議後，認為冇必要喺呢場輕鬆大勝入面製造不必要事端，所以改變計劃提早畀艾斯高登場，同另外2位球員同時入替。

呢10分鐘上陣係艾斯高2個月來首次喺西甲露面，不過皇馬對呢位前西班牙國腳亦已死心，《Goal》網站消息指球會已決定畀佢1月份自由轉會，據報祖雲達斯曾經向佢進行接觸，求才若渴嘅英超球會紐卡素亦對佢虎視眈眈。