美洲兵趕返英國　韋斯咸接安東尼奧最揼本

joemalee · 發表於 2021-11-19 08:43:44

每逢國際賽期都係球會噩夢，除咗要擔心球員受傷之外，最頭痛係要接一班跨洲比賽嘅球星返嚟歐洲比賽。英超多支球隊為接旗下美洲兵出盡法寶，曼聯、列斯聯、曼城同利物浦聯手租用私人飛機，接載一班巴西兵返英國，而韋斯咸就最豪，掟10萬鎊去接牙買加前鋒米查利安東尼奧返倫敦。

利物浦門將艾利臣比加喺IG貼相，顯示巴西喺世盃外對阿根廷後，佢同法賓奴、加比爾捷西甲、艾達臣摩拉斯、拉芬夏比洛尼同費特6人，一齊喺私人飛機上面合照，個個都神情輕鬆，似系呢段旅程都好舒適。不過倫敦三雄代表加比爾馬加希斯(阿仙奴)、堤亞高施華(車路士)同艾馬遜(熱刺)就冇份上機，相信係另有安排。