法國足總力撐　賓施馬若判監照踢世盃！

joemalee · 發表於 2021-11-13 08:48:20

法國前鋒賓施馬捲入嘅「性愛影片」勒索官司，今個月24號法庭就會作出裁決，不過法國足總主席利格列日前公開表示，就算賓施馬被裁定有罪，領隊迪甘斯依然可以揀佢入國家隊，為呢位皇家馬德里前鋒出戰明年世界盃開綠燈。

賓施馬喺2015年捲入法國隊友華布拿被勒索案件，佢亦因為呢單官司被迪甘斯「雪藏」5年，直到今年歐國盃決賽周前先至獲得重召，上個月仲協助法國贏埋歐國聯冠軍，表現獲一致好評。賓施馬嘅官司今個月24日會有結果，檢控官要求判賓施馬10個月嘅緩刑監禁。

被視為法國球壇最有權力嘅利格列，日前接受《巴黎人報》訪問表示：「就算賓施馬被判有罪，佢都可以提出上訴，所以佢之後會唔會入選國家隊，同呢次判決並冇關係，唯一作出決定嘅人係領隊迪甘斯，佢會由競技層面去作出決定。」法國周日(14日)凌晨主場對哈薩克，只要贏波就肯定出線明年世盃決賽周。