傳奇回歸！巴塞官宣沙維接手救亡

joemalee · 發表於 2021-11-7 12:05:34

擾攘多時，沙維正式回家。巴塞隆拿於周六（6日）終於宣布，名宿沙維落實回歸執教，簽約2年半，預計國際賽後首仗聯賽、即係加泰隆尼亞打吡主場對愛斯賓奴，會成為沙維回家處子戰。

巴塞官方聲明表示，沙維的合約為今季餘下賽事再加2年，並喺下周一出席記招。雖然沙維之前所執教嘅卡塔爾勁旅艾薩德，尋日已宣布放人，但巴塞未有即時官宣沙維回歸，原因係巴塞依家工資帽仍然高於西甲規定，若果拎500萬歐元為沙維「贖身」便會違規，因此有指巴塞同沙維各承擔一半嘅合約違約金，即雙方各承擔250萬歐元，傾掂晒條數先至正式官宣。不過沙維唔需要真金白銀拎出嚟，有指由於佢一直擔任卡塔爾形象大使，可用代言費來抵銷違約金，總算皆大歡喜。