奧巴美揚讓位！阿仙奴速度王係佢？

joemalee · 發表於 2021-11-6 08:28:07

阿仙奴前鋒奧巴美揚向來以高速度見稱，不過呢位加蓬射手已經32歲，速度難免會出現下降，早前回巢跟操嘅韋舒亞就曾透露，阿仙奴陣中最高速球員已經唔係奧巴美揚，而係蘇格蘭左閘基蘭泰亞尼！

奧巴美揚日前接受訪問，公開承認自己已經唔係隊中最快球員：「我哋有幾個好快嘅球員，如果係跑80米至100米，我仍然會係最快嗰個，但如果鬥30米，基蘭泰亞尼同紐奴泰華利斯會贏，佢哋嘅第1步真係好快！如果我依家係17、18歲，我一定會跑贏佢哋！」據STATSports嘅統計數字，基蘭泰亞尼錄得嘅最高時速係37公里。