熱刺4任領隊同一個密碼──2023

joemalee · 發表於 2021-11-5 08:36:51

熱刺日前宣布聘請意大利名帥干地執教，唔少人都睇好佢哋有機會打破長達13年嘅錦標荒，不過有傳媒發現，原來熱刺近4任領隊都有一個共同「密碼」──2023，即係球會向4位領隊開出嘅合約到期年份。意味熱刺向領隊開出嘅合約愈嚟愈短，似乎唔係咁有信心喎！

熱刺喺2018年連續3季躋身聯賽前3名後，立即同普捷天奴續約5年去到2023年，1年之後更加殺入歐聯決賽，但唔夠半年之後就因為成績急跌被炒魷。接任嘅摩連奴喺2019年11月上任，球會開出3年半合約到2023年，但「寸王」只教唔夠2季就被炒魷。

今個夏天紐奴上場，佢本身只係熱刺「第7人選」，所以球會開出嘅合約進一步「縮水」，只簽2年到2023年，最終紐奴只捱到4個月就玩完。今次干地突然「轉軚」答應執教，但合約為期只有1年半，再一次係到2023年完結，就睇下干地有冇機會打破2023年呢個大限！