|
|
無線J2節目《安樂蝸》主持林穎彤(Bella)嘅媽媽捲入桃色糾紛，被爆料同年輕男性有不道德交易。記者向Bella了解事件，Bella話係媽媽同人有金錢瓜葛，已經報警云云。
Bella同媽媽相依為命，對呢件事梗係著緊。翻查資料，原來喺葵涌長大嘅林穎彤細個家境清貧，仲有報導話Bella出世冇耐，佢爸爸就拋妻棄女，Bella媽媽要獨力湊大個女，試過無計可施之下要抱住Bella行乞同執紙皮，後來申請到綜援先至改善到生活。生性嘅Bella童年時因為想要嘅禮物而參加電視台節目，因此被發掘做童星，十歲時同馮寶寶拍過亞視劇集《萬家燈火》，之後又接show唱歌表演。到16歲Bella參加選秀節目《十人巷》勝出而加入TVB，由於做藝人收入唔穩定，佢試過去眼鏡鋪打工幫補，直至主持《安樂蝸》後漸為人認識，收入先開始穩定。Bella唔止做主持，參演劇集《城寨英雄》孖辮妹「鑫鑫」一角，觸動無數觀眾。近年Bella簽約星夢做埋歌手，再撈多瓣。
林穎彤接受Yahoo TV《娛樂訪談》都提到因為家境而自卑嘅往事。Bella話七八年前試過有位圈中前輩揸車送佢返屋企，因為唔好意思要對方泊車喺自己住嘅屋邨，又驚對方知自己嘅家境，於是叫呢位前輩俾佢喺附近另一個屋苑落車。點知前輩好細心咁想等Bella入咗屋苑大閘先走，Bella唯有硬著頭皮㩒大閘密碼！好在喺俾人發現之前，前輩已經揸車走咗，如果唔係就超尷尬！
而家睇返Bella覺得件事好傻，當時個人冇自信，好介意人地點睇，其實係要接受先自己出身， 而家已經唔會咁做。
即使係咁，因為媽咪住慣咗，林穎彤仲未搬離葵涌屋邨。訪問入面，Bella呢個地膽都提起喺葵涌廣場嘅日子，仲話試過因為有「偶像包袱」，中學時代買完10蚊2餸冷麵之後要匿入後樓梯食！ |
|
在線雷達
發表於 2021-10-21 13:43:57
廣播
置頂
超級提昇
強效提昇
推舊帖
收嗲鳥
油顏色
