曼聯球員「私片」　估蘇B得番2場機會自救

joemalee · 發表於 2021-10-21 08:32:14

曼聯近3場英超只有1和2負，領隊蘇斯克查下台壓力愈來愈大，英國《太陽報》爆料，指有曼聯球員私下討論蘇B嘅前途，認為呢位挪威名宿只有2場機會自救，如果曼聯周四(21日)凌晨歐聯主場對阿特蘭大，以及周日(24日)晚英超主場對利物浦，都贏唔到1場嘅話，蘇斯克查就會被炒。

事實上，呢2場波對於曼聯英超及歐聯爭標非常關鍵，紅魔鬼現時喺歐聯F組，同年青人一樣有3分，落後榜首阿特蘭大1分，如果曼聯贏唔到阿特蘭大，而年青人擊敗維拉利爾，曼聯出線形勢將會非常被動。

英超方面，曼聯排第6位，落後榜首車路士5分，亦比利物浦少4分，若然未能擊敗利物浦，甚至輸咗呢場「6分波」，曼聯重奪英超美夢，恐怕又會凍過水，到時曼聯管理層想撐蘇斯克查，都撐唔住。