沙迪奧文尼獲贈黃金戰靴　高普大讚

joemalee · 發表於 2021-10-19 08:03:16

利物浦今季氣勢強勁，穆罕默德沙拿「球王級」嘅表現當然最受注目，不過沙迪奧文尼亦交出極佳表現，上場對屈福特入波，係佢喺英超第100個入球，贊助商New Balance亦特別送佢一對黃金戰靴，領隊高普亦大讚佢係世界級前鋒。

沙迪奧文尼今季各項賽事已有6個入波，上場對屈福特入球，令佢成為英超史上第30個入波達100球球員，而且當中更冇1球係嚟自12碼，高普表示：「沙迪奧文尼呢個紀錄最特別地方，係100球入面冇1球係12碼，呢個世界唔係好多人做得到，佢係世界級前鋒，絕對應該引以為榮。」

沙迪奧文尼嘅贊助商New Balance，特別設計一對紀念版波砵畀佢，呢對Furon v6用上金色設計，而且仲有「100 goals」字樣。就算穆罕默德沙拿明年決定離隊，至少利物浦球迷知道佢哋仲有一個頂級嘅沙迪奧文尼可以信賴。