巴塞冇美斯一收入全線告急

joemalee · 發表於 2021-9-21 21:56:32

美斯喺巴黎聖日耳門仍未入波，另邊廂美斯離隊後，巴塞隆拿都好大鑊，現時成績仲未反映出嚟，但商業收益同品牌價值，預計都會大幅度下降。

西班牙《阿斯報》報道，預測巴塞今季商業收入將會減少7700萬歐元，當中比賽日收入下跌1700萬歐元，原因係美斯等巨星離隊後，巴塞吸引力大減，比賽日收入勢必下跌，至於球衣銷售在欠缺巨星做生招牌下，收入亦會減少4300萬歐元。

至於巴塞嘅品牌價值，將會下降11%，現時巴塞嘅品牌價值為12.66億歐元，但依家冇球王級巨星壓場，肯定冇咁值錢。

巴塞嘅將來只會更差，現時最新情況，巴塞2.6萬名會員拒絕續訂季票，令季票收入減少4000萬歐元，日本樂天集團將於明年夏天結束合作，巴塞未來每年少收3000萬歐元贊助費。