希丁克宣布退休車仔少咗1位「救兵」

joemalee · 發表於 2021-9-11 07:45:13

74歲荷蘭名帥希丁克宣布退休，結束34年教波生涯，呢位傳奇教練曾經執教多支球隊，包括2次臨危受命，擔任車路士看守領隊，帶領球隊走出困局，難怪當佢宣布退休之後，網民都話車仔少咗1位「救兵」。

希丁克上年8月開始執教中美洲庫拉索國家隊，但由於球隊喺世界盃外圍賽第2圈出局，希帥黯然下台，佢最近接受傳媒訪問時，承認唔會再教波，並從此退休。

希丁克34年教練生涯，曾經執教燕豪芬、華倫西亞、皇馬、荷蘭、南韓、澳洲、俄羅斯、土耳其國家隊等球隊，甚至短暫做過中國U21主帥。佢最為人津津樂道嘅成績，一定係帶領南韓打入2002年世界盃4強，可以話係當年最大冷門。

另外，希丁克2009年、2015年2次臨危受命，半途執教車路士，包括協助車路士奪得2009年英足盃冠軍，被稱為係車仔老闆阿布拉莫域嘅「御用教練」。