英超8巴西腳被禁賽政府出面求網開一面

joemalee · 發表於 2021-9-10 08:19:54

9月份國際賽期，英超球會禁止旗下美洲球員返國家隊踢世盃外，結果搞出大頭佛，巴西足總日前引用國際足協條例，要求8名「未歸隊」嘅國腳停賽5日，連同智利、巴拉圭同墨西哥亦採取同樣措施，合共11名球員將無緣今個周末英超。

巴西要求「制裁」嘅名單包括艾利臣比加(利物浦)、羅拔圖法明奴(利物浦)、法賓奴泰華利斯(利物浦)、堤亞高施華(車路士)、加比爾捷西斯(曼城)、艾達臣摩拉斯(曼城)、費特洛迪古斯(曼聯)同拉芬夏比洛尼(列斯聯)，停賽期由9月10日至14日，意味8人除咗缺席今個周末賽事外，費特洛迪古斯同堤亞高施華仲會錯過埋下周二嘅歐聯分組賽。

紐卡素中場米基爾阿米朗(巴拉圭)、狼隊前鋒魯爾占美尼斯(墨西哥)同屈福特後防施亞拉達(智利)，早前都受到所屬足總追究，將會一齊停賽。不過，英國傳媒報道，英格蘭足總、英超聯賽會以及英國政府，都已經同國際足協交涉，希望能夠體諒球會喺疫情限制之下嘅考慮，對呢11位球員網開一面。