等等皇馬約定麥巴比明年1月簽加盟協議

joemalee · 發表於 2021-9-1 20:48:02

西甲豪門皇馬喺夏季轉會市場關閉前，孤注一擲，開出2億歐元向巴黎聖日耳門(PSG)收購前鋒基利安麥巴比，但仍然被呢支法甲勁旅拒絕。據悉，皇馬將會爭取喺明年1月同基利安麥巴比簽加盟協議，等佢明夏約滿以自由身轉投「銀河艦隊」。

皇馬之前已經兩次報價，希望簽入基利安麥巴比，上次開出1.8億歐元被拒之後，最後一刻更加提升至2億歐元，但由卡塔爾王室擁有嘅PSG根本唔志在，甚至有傳唔回覆皇馬最後報價。

據悉，PSG仍然未放棄同基利安麥巴比續約，計劃10月再同佢展開續約談判，但呢位22歲法國國腳早前已經拒絕PSG開出嘅4,500萬歐元年薪續約條件，似乎已經下定決心，等明年夏天約滿離隊。

由於麥巴比喺明年1月就可以同其他球會傾加盟事宜，皇馬希望到時可以搶先同佢簽加盟協議，確保明夏可以免轉會費將呢位新世代球王收歸旗下。