|
|
TVB劇集《智能愛人》播出以來贏盡口碑，網民激讚李佳芯將AI智能人角色「阿寶」演得入型入格仲充滿喜感，例如一開頭第二集去街市學買餸鬧豬肉檔主「嘟」聲四起：「我嘟你個嘟嘟，夠膽呃阿姐，我嘟爆你個嘟嘟......」都令人爆笑。不過，早前播出阿寶被古家廉（陸永飾）狠心趕走一幕，網民就話從李佳芯嘅演技中感受到阿寶嘅冤屈同傷心。
早前劇情講到阿寶開始有人類情感，因為中意「主人」古家廉而妒忌多姐（馮盈盈飾），甚至故意令髮型屋電髮器故障，等多姐去唔到舞會。及後，古家廉仲懷疑阿寶刻意整壞多姐嘅智能家居系統，令佢昏迷不醒，所以就趕走阿寶。阿寶就以好似Lag機咁嘅形式回答：「主人，唔信阿寶…我…我…我無心…主人唔信我…」；當時古家廉仲直指阿寶已經壞咗並叫佢離開，阿寶回應「如確定請講確定」，一班網民睇到呢一幕就大讚感動，好心疼阿寶，仲話睇完呢套劇覺得李佳芯真係實力派，今年可以再拎視后。
《智能愛人》監製陳翹英就曾透露，自己一直以嚟都係做啟發角色，主要由李佳芯自己再諗點演。被古家廉趕走一幕，用Lag機形式演繹AI智能人嘅冤屈都係由李佳芯自行添加；監製陳翹英亦曾表示好滿意李佳芯嘅表現，因為AI智能人個角色好難演，由其係頭幾集喜怒哀樂都唔可以表現出嚟。 |
|
在線雷達
發表於 2021-8-25 14:48:47
廣播
置頂
超級提昇
強效提昇
推舊帖
收嗲鳥
油顏色
