【官宣】賓施馬續約皇馬至2023年

joemalee · 發表於 2021-8-21 09:55:46

西甲勁旅皇家馬德里周六(21日)宣布，球會同法國前鋒賓施馬達成續約協議，新合約會到2023年夏天，到時賓施馬已經35歲，意味呢位前鋒好大機會喺皇馬踢到收山，成為「銀河艦隊」嘅真正傳奇。

賓施馬喺2009年同C朗拿度、卡卡一齊加盟，風頭當然唔及其他巨星，但佢12年來一直為球隊交出極高水平表現，尤其C朗拿度離隊後，近3季都喺西甲入超過20球，佢目前係皇馬史上入波最多球員第5位(281球)，未來2年佢只要入多28球，就可以超越辛迪拉拿(290)同迪史堤芬奴(308球)進佔3甲。

皇家馬德里今個暑假雖然冇錢買人，但續約工作就進展順利，之前已經同莫迪歷(2022年)、盧卡斯華斯基斯(2024年)、拿祖費南迪斯(2023年)、丹尼爾卡華積(2025年)及泰拔高圖爾斯(2026年)續約，賓施馬就成為第6個效忠球員。