免費餐食上癮！PSG鎖定明年兩大約滿球星

joemalee · 發表於 2021-8-18 06:09:51

法甲勁旅巴黎聖日耳門(PSG)今夏轉會成績大獲好評，免費簽入美斯、沙治奧拉莫斯、基安盧基當拿隆馬同韋拿杜姆4大球星，更加被視為史上最強轉會操作。PSG食免費餐似乎食上癮，繼傳中有意簽入明年自由身嘅C朗拿度後，據報仲密切注視保羅普巴同卡馬雲加兩大即將約滿嘅中場。

法國《隊報》消息指，保羅普巴同卡馬雲加本來都係PSG今夏收購目標，不過因為美斯突然回復自由身，PSG自然將所有資源放喺「球王」身上，雖然球會仍然希望今個轉會窗出手，但增兵前就要先清洗部份球員，喺時間緊逼之下未必能夠成事。

保羅普巴同曼聯以及卡馬雲加同雷恩嘅合約都得番唔夠1年，所以PSG亦唔心急，反而會靜心等待明年夏天再「免費」。18歲嘅卡馬雲加已經拒絕雷恩續約，雖然皇家馬德里同曼聯都對佢虎視眈眈，但消息指卡馬雲加最想都係加盟PSG。