升班球隊不得了！屈福特都贏波

joemalee · 發表於 2021-8-15 07:50:01

周六晚英超賽事，升班球隊屈福特主場迎戰阿士東維拉。「大黃蜂」屈福特開季首仗即製造驚喜，以3比2擊敗實力分子阿士東維拉，聯賽有個好開始，雖然比唔上揭幕戰賓福特2比0擊敗傳統豪門阿仙奴咁震撼，但升班兄弟首輪齊取勝，勢必令今季英超更精彩！

屈福特同諾域治前季由英超降班，僅花一季時間就由英冠雙雙極速重返英超，另一支升班隊係賓福特。屈福特重返英超首仗火併維拉，開賽10分鐘即由尼日利亞前鋒艾曼紐丹尼斯開紀錄，42分鐘伊斯美拿沙亞再下一城，屈福特半場領先2比0。

下半場67分鐘，古曹靴南迪斯「世界波」建功，屈福特贏到3比0，以為大局已定，末段維拉狂追，3分鐘後約翰麥甘尼破蛋追成1比3，戰至補時7分鐘維拉博得12碼，丹尼艾格斯主射追成2比3，不過當時已經夠晒鐘，球證稍為補時就吹完場，屈福特最終贏3比2全取3分。