傳無綫有意將Gigi／Chantel／Yumi／Aeren組港版BLACKPINK

GIRLAV · 發表於 2021-7-21 11:40:05

無綫選秀節目《聲夢傳奇》決賽喺噚晚舉行，由最後5強炎明熹（Gigi）、姚焯菲（Chantel）、鍾柔美（Yumi）、何晉樂（Rock）及冼靖峰（Archie）角逐總冠軍殊榮，最終由Gigi成為三料冠軍。除咗Gigi之外，《聲夢傳奇》仲有多位人氣學員，今日有傳無綫有意將Gigi、Chantel、Yumi同文凱婷（Aeren）組成唱得又跳得嘅港版BLACKPINK，並將佢哋簽俾環球或華納。

對於大台今次嘅決定，網民意見好壞參半，不過有報道指全部學員喺受訓前，已經同無綫及星夢分別簽咗經理人和唱片合約，但無綫考慮到星夢捧歌手嘅往績，同埋最大嘅好處，所以就算簽咗星夢都可以有特別安排。最緊要係好似MIRROR咁可以團體同單飛吸粉絲同吸金，成為一個雙嬴局面。

9月先升讀中四嘅Chantel，已與無綫簽約5年，早前憑演唱《戀愛預告》人氣急升，其甜美風格令佢得到「國民初戀」嘅稱號，由參賽初期開始吸引唔少粉絲，甚至連吳業坤（坤哥）都係佢嘅粉絲。早前有報道指Chantel有個有型又叻嘅富爸爸姚輝文，於投資公司擔任首席財務官（CFO）及常務董事，家住位於荃灣半山市值2000萬豪宅。家境富裕嘅Chantel，日前就俾人見到做乖乖女孖住爸爸去尖沙咀一個樓盤收樓，兩父女穿上白衣樸素衣服，Chantel仲要素顏戴眼鏡及戴上口罩，佢哋逗留大約半個鐘完成手續，然後齊齊離開。