《逆天奇案》馮盈盈被批演技浮誇講英文作狀

GIRLAV · 發表於 2021-6-4 13:40:46

無綫劇集《逆天奇案》嘅男女主角雖然係陳展鵬同埋林夏薇，但「女二」馮盈盈似乎比林夏薇更加搶鏡。劇情主要圍繞「殺虎案」，最近幾集就講到Ana（馮盈盈飾）為咗調查「殺虎案」真相而去魏豐集團打工，更成為細魏生（陳少邦飾）嘅私人助理。佢利用自己嘅黑客技術查看公司機密檔案，更查出戴查爾曾任僱傭兵，但原來Ana查到嘅一切都係魏子樂（張頴康飾）同埋尤麗（劉佩玥飾）安排。

馮盈盈喺依幾集好多發揮空間，可惜網民認為馮盈盈嘅演技較浮誇、作狀及反應太假。同時，亦有網民認為佢咬字唔清晰、講廣東話唔正、講英文尾音造作地大聲、配音同嘴型又唔同步等等。

另外，更有啲字眼令觀眾聽唔明，例如「想當年我一個人行走『漿』湖」, 觀眾懷疑自己係唔係聽錯，不過有網民力撐佢嘅演技同口音，因為劇中講Ana係喺南美長大，中文唔好都正常，佢專登將「江湖」講成「漿湖」，因為行走漿湖呢個說法好多年前已經流行。