解決矛盾　MK恩續約同寸王拍住上

joemalee · 發表於 2021-6-3 06:22:44

意甲球會羅馬宣布，成功同中場米希達利恩(MK恩)續約至2022年6月30日，據悉呢位32歲阿美尼亞國腳同新教練摩連奴傾完之後，已解決兩人之間嘅矛盾，所以願意續約留隊，下季一齊打江山。

米希達利恩效力曼聯期間曾經同摩連奴合作過，但一直唔適應「寸王」嘅戰術，甚至暗指摩帥排兵佈陣不當，最終黯然轉投阿仙奴，事業走下坡，直至2019年9月加盟羅馬，表現先至有起色，並成為球隊主力，今季為羅馬射入14球及13次助攻。

不過，羅馬宣布摩連奴下季成為新帥之後，有傳米希達利恩打算唔續約，自由身離隊，《羅馬體育報》指摩連奴上周親自打電話畀「MK恩」，兩人打開天窗說亮話，解決彼此心中嘅矛盾，結果米希達利恩同意續約。

據悉，羅馬原本希望米希達利恩續約2年，但佢只願意續約1年，因為一旦發現同摩連奴唔夾，起碼明夏可以走人。「MK恩」續約之後，年薪由稅後300萬歐元，增加至400萬歐元。