皇家馬德里官方證實，教練施丹離開皇馬。

joemalee · 發表於 2021-5-27 21:58:50

皇馬嘅聲明指出 :「施丹決定辭去皇馬主教練一職。球會尊重佢嘅決定，並對咁多年佢所做出嘅奉獻、熱情和職業精神表示感激。施丹係皇馬歷史上嘅偉大傳奇之一，無論作為球員和教練，佢嘅貢獻已經遠遠超越傳奇本身。施丹知道佢永遠會得到皇馬球迷支持，而皇馬永遠都係佢嘅家。」
施丹嘅合約到2022年夏季，但今季球隊四大皆空，佢決定提早一年拜拜，亦都係佢第三次主動同皇馬「分手」，消息指佢一早已經同球員交待自己嘅未來，亦通知咗皇馬高層，佢希望可以畀球隊有時間搵新領軍人物，以加速今夏重建。施丹2006年合約未到期嘅情況下決定退役，跟住2018年以主帥身份帶領皇馬完成歐聯三連冠後離開，今次係佢第三次同皇馬講再見。

隨着施丹決定辭職，皇馬都要急搵主帥，阿里基同埋勞爾之前都係傳媒熱捧人選，但隨着干地同國米提早解約，好快被傳佢會執教皇馬，事實上，2018年干地差啲做咗皇馬主帥，佢一直都係皇馬高層嘅理想人選，但當時有幾位重心球員唔鍾意干地，所以先打消念頭，今次佢會唔會執教銀河艦隊就有待分曉。