迪基亞5年未救過12碼　悲情告別曼聯

joemalee · 發表於 2021-5-27 08:17:36

曼聯喺歐霸盃決賽表現無厘神氣，由領隊蘇斯克查到落場球員都冇幾多個交出令人滿意嘅表現，不過要捉「戰犯」仍然非門將迪基亞莫屬，維拉利爾今場全場得1次中龍射門就入波，更令人失望嘅係佢喺互射12碼竟然11球全部救唔到，最後更由佢自己做全場唯一宴客球員，注定迪基亞嘅曼聯生涯會悲情終結。

曼聯下半季已經偏向由甸恩軒達臣做No.1，不過迪基亞喺歐霸盃4強嘅表現，就令佢得到決賽上陣機會，去到加時階段尾聲，唔少球迷都認為蘇斯克查應該換入甸恩軒達臣救12碼，因為迪基亞救12碼嘅成功率係慘不忍睹！

統計顯示，迪基亞對上一次喺「非互射12碼」階段救出極刑，已經要數到2016年，5年來面對21個12碼全部失守，相反甸恩軒達臣同期內曾經救出8個12碼，最近14次面對12碼救出8球。迪基亞失去正選後，盛傳今個夏天好大機會離隊，如果今場係最後一戰，佢將以罪人身份結束10年曼聯生涯。