重演曼聯好戲　祖記想簽迪比做C朗接班人

joemalee · 發表於 2021-5-20 06:16:11

祖雲達斯衞冕意甲失敗，聯賽9連冠走勢告終，球隊今夏勢必面臨大改革，除咗教練派路九成要執包袱之外，盛傳巨星C朗都可能離隊。意大利傳媒指，祖記方面已經有C朗接班人人選，就係里昂翼鋒迪比。

現年27歲嘅迪比曾經身穿曼聯7號球衣，當年都被紅魔鬼捧為C朗接班人，可惜表現令人失望，最終黯然轉投里昂。不過，呢位荷蘭國腳近年表現大翻生，更加協助里昂打入上屆歐聯4強，其中16強次回合對祖雲達斯，射入關鍵作客入球，成為晉級功臣，亦令祖記管理層對佢留下深刻印象。

迪比今季仍然保持水準，為里昂各項賽事上陣38場入21球，最重要係佢將於今夏滿約，可以自由身離隊，祖雲達斯一向以擅長簽入自由身球員見稱，或者真係可以斟掂迪比加盟。