表演賽一樣！列斯聯炒般尼4蛋！

joemalee · 發表於 2021-5-15 22:51:22

周六(15日)英超早場，列斯聯展示「喪攻王」本色，作客大炒已護級成功嘅般尼4比0。今場兩隊喺冇壓力下踢得好開放，各有16次射門，列斯聯把握力較佳，最終大勝一仗。

列斯聯季初嘅全攻型踢法，打窒唔少強隊，不過早前改變踢法加強防守，先至冇咁癲，嚟到季尾階段，護級同爭標都冇份，兩隊喺無壓力下大解放，列斯聯回復喪攻本色，作客都圍住對手嚟攻，直情表演賽一樣！

開賽早段，列斯聯有阿里奧斯基射門「大撻」，以及拉芬夏比洛尼嘅「倒掛金鈎」射失，戰至44分鐘終於由基列治禁區頂邊走邊射熨死角入網，半場列斯聯領先1比0。
下半場比爾沙作出調動，換走主力射手班福特，由洛迪高摩連奴入替，戰局亦告改寫，60分鐘阿里奧斯基禁區勁射再度「大撻」，但死好彩畀門前積夏里遜改變方向入網，列斯聯贏到2比0。

賽事末段列斯聯打快速反擊，積夏里遜連續兩度妙傳，洛迪高摩連奴先後喺77同79分鐘梅開二度，埋單贏夠4比0完場。