捧盃減人工？國米要球員減薪2個月！

joemalee · 發表於 2021-5-11 21:35:35

國際米蘭早前提前重奪失落11年嘅意甲冠軍，不過球員面對嘅並唔係豐厚獎金，而係被要求放棄2個月人工！據意大利《米蘭體育報》爆料，國際米蘭主席張康揚日前同球員見面45分鐘，期間要求教練同球員放棄2個月薪金，以助球會度過財政難關。

據報國際米蘭若果喺6月30日嘅財政年度完結前，同所有職球員達成減薪協助，可以避免2,500萬歐元嘅稅務開支，不過消息指呢個計劃已經被球員拒絕，而今次會議更加未有教練干地參與，令人擔心財政問題會影響球會未來發展。

國際米蘭周三深夜主場對羅馬，球會已宣布取消賽前記招，據報係唔想干地被問到有關減薪問題。《米蘭體育報》指干地會喺未來幾個星期同張康揚會面，商討去留問題，報道指如果國米因為財政壓力而出售隊中主力，干地就會要求離隊。