拜仁又走一人　馬天尼斯今夏離隊

joemalee · 發表於 2021-5-5 23:01:09

德甲勁旅拜仁慕尼黑宣布，防守中場查維馬天尼斯將於今季收咧之後，約滿離隊，結束效力呢支班霸嘅9年生涯。查維馬天尼斯亦係繼謝路美保定、阿拉巴之後，第3位落實今夏走人嘅拜仁球員。

現年32歲嘅查維馬天尼斯2012年以4,000萬歐元轉會費，由畢爾包加盟拜仁，呢個數額喺當時已經屬於天價。呢位西班牙國腳可以勝任防守中場同中堅，但近年上陣時間大為減少，今季德甲僅上陣17次，而且只有4次係正選。

拜仁方面透露，指查維馬天尼斯將於6月30日約滿，球會同佢本人都無意續約，所以佢可於今夏自由身離隊。

查維馬天尼斯已經協助拜仁連續奪得8季德甲冠軍，相信今季亦可以捧盃，佢離隊之後，好可能會重返西甲搵食。