沙拿準備創造100年壯舉

大賓哥 · 發表於 2021-5-2 22:34:24

將於周日(2日)深夜上演嘅英超「雙紅會」曼聯主場對利物浦，備受全球關注，利物浦前鋒穆罕默德沙拿更加有機會創造1項百年壯舉，佢只要今場入波，就會成為近100年以來，首位單季2次作客曼聯，都取得入球嘅利物浦球員。

對上1位單季2次作客曼聯，都有波入嘅紅軍球員，已經係1921年嘅哈利張伯斯，呢位名宿曾於1915至1928年效力利物浦，為紅軍合共上陣310次，射入135球。

穆罕默德沙拿今年1月英足盃作客曼聯，個人梅開二度，可惜利物浦輸2比3出局，呢位埃及國腳今場唔止有機會報仇，仲可以創造新紀錄，應該會使出渾身解數，力爭射破紅魔鬼大門。