Spotify老闆宣布：買阿仙奴資金已Ready！

joemalee · 發表於 2021-4-30 06:38:22

阿仙奴爭奪戰愈演愈激烈，Spotify老闆埃克早前表明想收購「愛隊」後，阿仙奴班主高安基隨即發表聲明，話佢哋無意出售「兵工廠」，不過埃克仍未死心，周三(28日)接受電視台訪問，公開宣布非常有誠意收購阿仙奴，仲話收購資金已經Ready，希望高安基會作出考慮。

市值超過31億英鎊嘅Spotify，創辦人之一埃克周三接受《CNBC》訪問，親口證實想收購阿仙奴：「我由8歲已經係阿仙奴球迷，好鍾意呢支球隊，佢哋嘅歷史、球員同球迷，我認為今次係好好嘅機會幫球隊重拾光輝。我係非常認真，收購嘅資金已經預備好，希望高安基可以慎重考慮。」

英國《天空體育》消息指，埃克會喺未來幾日正式開價18億英鎊收購，佢哋早前仲搵嚟柏金、亨利同韋拉3大名宿作為收購行動大使，成功贏得球迷支持。自歐超聯事件後，阿仙奴球迷曾發起反高安基示威，多數球迷都支持埃克嘅收購行動。