麥明詩復出拍《天與地》監製亞視網劇林文龍出面借人吸噱頭

GIRLAV · 發表於 2021-4-23 12:33:41

麥明詩（Louisa）喺2015年拎到香港小姐冠軍後一直備受力捧，拍劇、節目主持，甚至喺大騷司儀統統都有佢份，不過佢喺當紅時期就話娛樂圈係好玩，但就越嚟越無安全感，覺得同世界脫軌一樣，所以佢就喺2019年11月棄做無綫親生女改簽一年一騷嘅「綠葉約」，仲做埋商業顧問工作，不過佢嚟緊將會復出拍劇。

復出頭炮並唔喺幫無綫拍劇，反而喺拍亞視一套30集網劇。今日有報道指今次新劇係由《金枝欲孽》、《天與地》前無綫神級監製戚其義主理，由亞洲心動娛樂（AMM）香港區副總裁林文龍親自出面問樂小姐借人，由於係網劇而唔係免費頻道所以同無綫無抵觸，樂小姐都大方放人，就連2019年港姐亞軍兼最上鏡小姐王菲都有份演出；而其他演員就包括黃又南、麥子樂、黃德斌、林耀聲、陳雅麗、黎紀君等，聲勢浩大，極具新鮮感。

麥明詩喺無綫最後一套劇集《殺手》演視障人士嘅演繹令人眼前一亮，仲得到伍詠薇出post大讚有意外驚喜同埋非常欣賞佢。麥明詩離開無綫後一直都令劇迷期待，監製戚其義向傳媒承認已邀請麥明詩復出，新劇將喺下月開拍；麥明詩接受訪問就話一直都好欣賞戚其義，監製承諾喺一個月內拍完，所以佢今次可以拎有薪假期同喺工餘時間參與拍攝，唔影響工作之餘仲可以keep到演戲興趣，表示好期待。