阿仙奴「傷鋒」　阿迪達搵19歲小將救亡

joemalee · 發表於 2021-4-23 07:40:11

阿仙奴將於周六(24日)凌晨英超主場對愛華頓，但兵工廠感染「大傷鋒」，2位主力前鋒拿卡錫迪、奧巴美揚因為傷病問題，未能出戰今場大戰，預料領隊阿迪達會用尼基迪亞擔任正選前鋒，而19歲小將巴洛根亦有望首次喺英超上陣。

奧巴美揚因為早前感染瘧疾，身體仍然未恢復十足狀態，近日只可以進行簡單訓練，最快都要等到下周中歐霸盃4強首回合作客維拉利爾，先至有望復出。至於拿卡錫迪上場英超對富咸，整傷左腳腳筋，亦無法出戰愛華頓。

因此，尼基迪亞應該可以擔正鬥愛華頓，呢位21歲前鋒今季為阿仙奴各項賽事上陣27次，射入6球，包括上場對富咸，佢入替拿卡錫迪，並喺補時入波，幫阿仙奴逼和
1比1。