未踢先開香檳　諾域治下季重返英超

joemalee · 發表於 2021-4-18 07:51:56

周六（17日）晚英冠連場激戰，其中3哥史雲斯及第4位嘅賓福特齊齊失分，變相令稍後時間登場嘅榜首諾域治已有足夠分數，肯定取得頭2名直接升班，相隔一季重返英超。

未踢今輪比賽前，諾域治以41戰得90分高据榜首，原本只要喺今晚尾場擊敗般尼茅夫，便可提前宣布取得直接升班資格，點知史雲斯、賓福特喺頭場唔爭氣，史雲斯主場被包尾嘅韋甘比逼和2比2，賓福特主場亦同米禾爾互交白卷，結果史雲斯得番4輪聯賽落後14分，賓福特剩低5輪差16分，令諾域治篤定能以聯賽前2名過終點，來季得以重返英超。

諾域治上季英超以38戰得21分包尾降班，不過一眾主力包括芬蘭國腳迪姆普基、英格蘭U21國腳中場簡威爾、右閘麥斯艾朗斯及荷蘭門神告魯爾，今季隨隊降落英冠，結果成功以超班姿態取得升班資格，由於排第2嘅屈福特亦以0比1不敵盧頓，諾域治只要多取5分便肯定封王。