莫耶斯又發功！要簽菲爾鍾斯

joemalee · 發表於 2021-4-12 08:12:44

韋斯咸1月尾向曼聯借用連格，效果極佳，盛傳會方有意買斷呢位英格蘭國腳，主帥莫耶斯食過番尋味，計劃
今夏再撬紅魔鬼球員，今次睇中菲爾鍾斯，似乎又想表演化腐朽為神奇，幫助呢位缺陣多時嘅後衞重生。

據悉，由於韋斯咸好大機會獲得下屆歐洲賽入場券，需要增兵應付連場大戰，但球隊財力有限，難以收購當打
球星，所以準備重施故技，簽入近年已淪為曼聯冗員嘅菲爾鍾斯。

菲爾鍾斯除咗不受曼聯領隊蘇斯克查重用之外，近年亦經常受傷，已經多次傳出會方打算出售呢位29歲英格蘭
守將，有傳只要有球會出到1,200萬鎊，就可以帶走菲爾鍾斯。

同連格一樣，莫耶斯執教曼聯時期，都同菲爾鍾斯合作過，熟悉佢嘅能力，話唔定菲爾鍾斯轉投韋斯咸後，可
以變成另一位連格。