徐子珊息影之作上架網民嗌出山網民仲想呢幾位復出...

GIRLAV · 發表於 2021-3-15 18:48:44

現年41歲嘅徐子珊，2004年參選港姐奪得冠軍後加入無綫，多年嚟拍咗唔少經典劇集，例如《溏心風暴之家好月圓》、《仁心解碼》及《潛行狙擊》等等，成為無綫花旦之一。2015年係徐子珊嘅事業高峯期，但佢選擇離巢，北上發展。2019年佢宣布退出娛樂圈，專注學業向心理學發展。徐子珊喺息影之作網絡電影《財神》中飾演柳七七，佢嘅古裝造型充滿仙氣，日前電影喺內地上架，電影連續三日登上「貓眼全網熱度榜」網絡電影第一位，唔少網民仲好期待佢復出。其實除咗徐子珊之外，網民們都好期待以下幾位女星「出山」拍劇。

陳法拉
現年39歲嘅陳法拉，2005年參選華姐獲得亞軍，加入無綫後隨即備受力捧，多年嚟參演過唔少經典劇集，例如《溏心風暴》、《師奶兵團》、《公主嫁到》、《巾幗梟雄之義海豪情》及《衝上雲霄II》等等。不過佢喺2013年離開無綫，之後用四年時間喺美國修讀戲劇碩士課程。畢業後演技獲得荷里活賞識，參演漫威最新英雄電影《上氣》（Shang-Chi and the Legend of the Ten Rings）及HBO迷你劇《The Undoing》。

鍾嘉欣
「女神」鍾嘉欣（Linda）係2004年華姐冠軍，入行後火速成為上位花旦，更參與多套劇集拍攝，例如《皆大歡喜》、《法證先鋒》、《溏心風暴》及《珠光寶氣》等等，成為當家花旦之一，事業一帆風順。自從2015年結婚生子後，嘉欣已經甚少參與幕前工作，專心照顧家庭。直至上年，佢由加拿大返香港接拍劇集《星空下的仁醫》（前名：兒科醫生），相信大家好快就可以再睇到佢嘅演出。

楊茜堯（原名：楊怡）
楊茜堯喺1999年開始拍劇，多年嚟都有唔少深入民心嘅經典角色，當中包括《賭城風雲》Mimi、《溏心風暴之家好月圓》孫皓月、《宮心計》麗妃及《On Call36小時》魚仔等等，更憑《名媛望族》康子君一角勇奪視后寶座，成為無綫當家花旦之一。2016年與羅子溢（前名羅仲謙）結婚後便減少幕前演出，上年更誕下囡囡羅翊心「小珍珠」。早前，楊茜堯應內地影視公司邀請，以千萬片酬夫妻檔拍由梁家樹監製嘅都市商戰劇《家族榮耀》，相信唔少網民都會好期待佢嘅復出之作呀！

朱千雪
32歲嘅朱千雪（Tracy），2012年港姐季軍，入行後獲得唔少演出機會，例如《On Call 36小時II》、《警犬巴打》及《EU超時任務》等等。佢喺2015年正值「上位期」嘅時候，突然向公司請假，到中大讀碩士增值自己，喺2016年再去城大修讀法律博士學位。上年佢由演藝界轉戰法律界，喺金鐘一間律師樓通過實習，並正式加入律師樓成為掛牌嘅執業大律師。