《陀槍師姐2021》陳庭欣搶人男友乞人憎獲網民大讚演得好

GIRLAV · 發表於 2021-3-4 15:30:50

2010年港姐冠軍陳庭欣（Toby），入行至今除咗做主持之外，佢亦拍過多部劇集，但唔知咩原因，佢不時都係飾演小三或搶人男友嘅進擊角色，好似近日喺劇集《陀槍師姐2021》中飾演檬Sir（陳豪飾）前妻關莎黛Sade。佢表面扮到大方得體，但實情佢一直想翻兜檬Sir，又討好大姨媽（羅蘭飾）及出陰招去破壞檬Sir同Diana（宣萱飾）嘅關係，名副其實係個雙面人，十分乞人憎。不過近日Sade因為USB中擁有錢順潮嘅罪證，而喺争執中被勒死。雖然角色唔討好，但網民們紛紛大讚嘅演技有進步同演得好好。

其實陳庭欣多年來都有好多大膽角色，令觀眾留下深刻印象，例如《多功能老婆》中Toby飾演黃浩然下屬兼小三，仲要向大婆楊千嬅面前「全裸」示威，睇到班觀眾勁嬲。《踩過界》Toby演跨性別人士，女人樣貌但軀體係男兒身，大部份網民都讚好。另外，陳庭欣喺《全職沒女》中飾演女高音歌唱家，佢喺泳池邊半裸大露背，情挑張兆輝一幕, 又成功為劇集爭取話題性。

雖然陳庭欣經常做配角，但睇得出非常用心去演，每一次都好吸引人注意，成功喺網上掀起話題。