《耳分高下》重播中味之天使／Sing之天使近況係點？

GIRLAV · 發表於 2021-2-24 12:16:45

由「哈林」庾澄慶及鄧健泓主持嘅綜藝節目《味分高下》／《耳分高下》，除咗內容吸引及哈林發揮搞笑本色之外，一班有樣有身材嘅「味之天使」和「Sing之天使」亦非常吸引觀眾眼球，當年播出時成功掀起唔少話題，而現時星期六無綫就重播緊《耳分高下》，唔知呢班「味之天使」和「Sing之天使」去咗邊？而家就同大家睇下佢哋嘅近況啦！

「味之天使」賈曉晨（梳打）
如果要數當時最紅嘅「味之天使」，相信一定非賈曉晨（JJ）莫屬。38歲嘅賈曉晨喺2006年參加《美女廚房》成為「美少女廚神冠軍」後加入娛樂圈，發展不俗嘅佢獲得唔少演出機會，除咗2007年《味分高下》擔任「味之天使」梳打之外，仲有電影《内衣少女》、《單身男女》、《寒戰》、電視劇《缺宅男女》、《怒火街頭2》及《好心作怪》等等。至於感情方面，JJ喺2012年與樊少皇拍拖，2016年拉埋天窗，其後更誕下囡囡「小飯兜」和「小飯團」，現時專心相夫教女，做幸福少奶奶。

「味之天使」張韋怡（啤梨）
2007年落選港姐張韋怡（Gogo），加入無綫後隨即獲得演出機會，成為「味之天使」成員之一啤梨。除此之外，有「御用宮女」之稱嘅佢亦參與過超過100套劇集拍攝，例如《宫心計》、《公主嫁到》、《BB來了》及《金宵大廈》等等，不過絕大部分都係一啲唔起眼嘅角色。雖然佢星運平平，不過就嫁得非常唔錯，於2014年閃婚富二代Michael Poon，其後誕下囝囝Ashton，做幸福少奶奶。現時佢哋一家三口居住喺九龍塘8,000呎超豪大宅，屋企裝修豪華，入面仲有私家電梯，另外仲有5位傭人、2名司機及1名私家看護。

「味之天使」陳宛蔚（雜果賓治）
2007年落選港姐陳宛蔚（Calinda），加入無綫後成為「味之天使」成員之一雜果賓治。除此之外，佢亦參與唔少劇集拍攝，例如《畢打自己人》、《ID精英》、《蒲松齡》及《公主嫁到》等等。佢最為人所知嘅一定係佢同錢國偉嘅戀情，二人喺《味分高下》認識。雖然佢哋年齡相差20年，不過依然無阻佢哋發展，並於2015年拉埋天窗，婚後佢淡出幕前仲誕下囡囡Abby，不過可惜老公錢國偉喺上年因胰臟癌病逝。

「味之天使」麥皓兒（忌廉）
麥皓兒（Cayley）喺2007年參選港姐，8強止步後加入無綫。除咗喺《味分高下》做「味之天使」忌廉之外，佢擔任過《放學ICU》和《問問Master Joe》等兒童節目及推出兒歌，當中包括洗腦歌《請你食麵》。佢亦一直默默耕耘咁拍劇，不過發揮機會唔多，直至《那些我愛過的人》飾演「進擊的小三」崔姑娘，成功令觀眾印象深刻。至於感情方面，麥皓兒與比自己細6歲嘅無綫藝員丘梓謙（Ivan）拍緊拖，佢哋仲越愛越高調添呀！

「Sing之天使」林芊妤（雪梨）
林芊妤（Coffee）憑「Sing之天使」雪梨入行，多年嚟一直都冇代表作，之後因「gathering事件」離開大台。之後佢開始發展瑜伽事業，由負評不斷慢慢成為一個擁百萬訂閱人數嘅YouTuber。Coffee瑜伽事業發展順利，教瑜伽班、拍教做運動嘅片及推出自家運動衫等等，搵嘅錢真係多過唔少藝人。2018年Coffee與圈外男友翟志榮結婚，並誕下囝囝翟德彥（伯伯），一家三口幸福美滿。

「Sing之天使」李悅彤（檸檬）
李悅彤（Liddy）憑《耳分高下》做「Sing之天使」檸檬，2014年因介入彭順和李心潔婚姻而為人認識，之後更被封「最強小三」。2018年低調下嫁澳門富商老公鮑偉業，並誕下囝囝James。已經離開娛樂圈嘅Liddy，除咗照顧家庭之外，現時主力做生意及經營個人影片頻道。

「Sing之天使」關宛珊（蜜瓜）
關宛珊（Kimmy）當年以客串形式擔任《耳分高下》「Sing之天使」蜜瓜，之後佢亦為唔少節目擔任主持及參演唔少劇集，例如《放學ICU》、《勁食日本一》、《宮心計》、《仁心解碼》及《愛·回家之八時入席》等等。Kimmy喺2016年與Patrick Sir（林溥來）拉埋天窗，早前佢哋仲宣佈造人成功添，真係恭喜晒呀！

「Sing之天使」劉俐（藍莓）
劉俐（Kibby）喺《耳分高下》擔任「Sing之天使」藍莓，之後都有參與年劇集拍攝，不過就局限於做花瓶角色。2014年離開無綫後，佢試過去上海幫親戚嘅公司做打雜及喺香港做美容產品售貨員等等。另外，劉俐亦喺舞蹈界發展，參加過唔少公開賽，例如世界舞蹈家錦標賽。