關淑怡/李香琴 ----- 三千年前

cocteau · 發表於 2021-1-4 22:46:50

關淑怡/李香琴 ----- 三千年前

李香琴的演技深受認同，歌喉亦了得，除了精於粵曲，也唱過粵語流行曲及錄唱片。琴姐不單止在電視劇中與年輕一輩的演員合作，2007更曾為關淑怡的歌曲《三千年前》配獨白，於CASH頒獎禮獲頒「最佳另類作品」獎。當年琴姐和關淑怡領獎時感動落淚，稱「今生無憾！」她還透露歌曲監製原以每次錄音二千元作報酬，但覺太少主動加碼為五千元，合共錄了3次共支付琴姐萬五元。

琴姐在開場獨白的第一句就說：「再見，唔好怪我第一句就同你講再見，因為我真係專程嚟同你道別嘅…」，歌曲最後再說出：「我要走喇！如果你記得返我係邊個？我知道，你一定會好唔捨得我，仲會好掛住我㗎！再見！」連聲的再見，說出萬千影迷的心底話。R.I.P. .....

以上影片乃youtube提供,與本站無關; 若無法觀看,可查看原網址。

李：再見！唔好怪我第一句就同你講再見，
　　因為我真係專程嚟同你道別嘅......

李：你唔講嘢，淨係聽我講嘢，
　　果陣時個世界好安靜，無而家咁嘈，
　　襯得我特別吱喳，特別開心
　　我記得，同你去睇日落，
　　你會係我耳仔邊講嘢，你講得好細聲，
　　其實我一啲都聽唔清楚架，
　　不過......我好鍾意聽你咁樣同我講嘢
　　以後......再無人咁樣同我講嘢喇！
　　因為你話俾我知......你要走喇！
　　忽然間......經過咗好多年啦......我再無睇過日落

關：趁熄滅前　還可一見
　　蠟成了灰　沾污了我的臉
　　眾生萬年　淚海悲天
　　浪漫擱淺　舊歡不見

李：我記得　你同我去過嘅每一度地方，
　　果啲地方，通通留係我心裡面，
　　我唔會講......我老喇，
　　我只係會講......我係度太耐，時間耐左，
　　難免知道人總會慢慢咁將過去淡忘，
　　又會睇住啲嘢，無聲無色咁樣消失！
　　我點解要走？！
　　我先兩日，唔知諗緊乜嘢，
　　無端端走咗去睇日落......
　　個日落，就同我記得陪住你睇嗰個樣一樣
　　不過......就算我點樣裝出若無其事，
　　我都無辦法唔承認，我失去嘅嘢實在太多啦！

關：趁熄滅前　還可一見
　　蠟成了灰　沾污了我的臉
　　眾生萬年　淚海悲天
　　浪漫擱淺　舊歡不見

李：我要走喇！
　　如果你記得返我係邊個？
　　我知道，你一定會好唔捨得我，
　　仲會好掛住我架！再見！