《香港愛情故事》游嘉欣獲網民關注盤點娛樂圈7個靚女「嘉欣」

GIRLAV · 發表於 2020-12-9 15:43:36

無綫新劇《香港愛情故事》搵咗唔少年輕演員演出，當中包括只有20歲嘅游嘉欣（Kayan），佢年紀輕輕又靚女，啲網民仲話佢可愛同笑容好燦爛。啲人成日話叫「嘉欣」都係靚女，咁啱佢又係叫嘉欣喎！香港娛樂圈真係有好多靚女「嘉欣」，不如而家就同大家數一數啦！

游嘉欣
游嘉欣（Kayan）就讀城市大學嘅管理學系，以KOL身份入行。雖然佢入行時間好短，但已經有唔少演出機會，除咗擔任《#後生仔傾吓偈》主持及做《天天開運王》嘉賓之外，佢亦開始參與劇集拍攝，例如《香港愛情故事》、《使徒行者3》及《刑偵日記》。佢喺《香港愛情故事》飾演羅天宇細妹陳子婷，係一個品學兼優嘅大學女神，喺噚晚嗰集佢仲同大學同學徐浩楠（徐文浩飾）正式拍拖。

李嘉欣
有「大美人」之稱嘅李嘉欣係中葡混血兒，1988年參選港姐獲得冠軍，入行後有唔少追求者。08年李嘉欣與富商許晉亨結婚，11年誕下囝囝Jayden，就算今年已經「入五」，但佢保養有方，至今依然風韻猶存。

鍾嘉欣
鍾嘉欣（Linda）係2004年華姐冠軍，入行後即被無綫力捧，更被網民捧為女神。鍾嘉欣BB多年嚟參與多套劇集拍攝，例如《皆大歡喜》、《法證先鋒》、《溏心風暴》及《珠光寶氣》等等，成為當家花旦，事業一帆風順。自從佢喺2015年結婚生子後，已經甚少參與幕前工作，專心照顧家庭。直至今年，佢由加拿大返香港接拍劇集《兒科醫生》，真係好期待佢嘅復出之作呀！

林嘉欣
入行多年嘅林嘉欣（Karena），電影發展可以話係順風順水，憑處女作《男人四十》橫掃多個電影獎項。雖然佢已經成為人妻，但佢魅力不減，至今依然係唔少人心目中嘅甜笑女神。

龔嘉欣
唔經唔覺已經入行12年嘅龔嘉欣（Katy），以往經常飾演妹妹及少女角色，近年佢嘅戲路越嚟越廣，演技備受肯定，好似憑《幕後玩家》飾演賢妻良母程思汝奪得「最佳女配角」。而今年觀眾有機會睇到更多變化嘅龔嘉欣，繼《大醬園》不擇手段嘅細么及《殺手》冷酷嘅Dark Angel後，佢今次喺新劇《香港愛情故事》飾演正宗港女Katy，成為今年視后大熱人選之一。

鄭嘉欣
有「港版石原里美」之稱嘅鄭嘉欣（Christine）係太陽娛樂旗下藝人，因想圓唱歌夢而參加《全民造星3》，憑住出眾外貌及高挑身形備受矚目。喺參加節目時，Christine深得一班男工作人員及網民喜愛，但可惜已經被淘汰。除咗參加《全民造星3》之外，佢早前已經為網劇《把砒霜留給自己》開工，同時亦有廣告及同公司傾緊出歌嘅事。睇嚟大家可以喺唔同渠道見到Christine啦！

蔡嘉欣
蔡嘉欣（Kayan）上年以KOL身份參選港姐，可惜大熱倒灶，只獲得「最迷人豐盈美唇大獎」。加入無綫後，佢比同屆佳麗有更多演出機會，除咗為節目《眼睛去旅行》及《姊妹淘》擔任主持之外，佢亦有機會拍接劇集《飛虎3壯志英雄》及《智能愛（AI）人》等等，明顯備受力捧。