六千宗屍體發現案及自殺案，破紀錄史無前例，查都懶查，通通一句「無可疑」，仲好意思講法證先鋒？無可疑喎 - 余家強

iamboyboy · 發表於 2020-2-29 10:33:58

百業蕭條，戲院、舞台尤甚，娛樂行頭，唯獨電視因禍得福，受惠於疫情令市民留家，收視反彈，立即自吹自擂，卻是否有點人血饅頭的滋味？而既然一枝獨秀，會否考慮義賣廣告救市報答客戶、承諾不再裁員呢？又唔見喎。

《法證先鋒4》高開露卅點，本就時勢造英雄，勝之不武，何況大半年來六千宗屍體發現案及自殺案，破紀錄史無前例，查都懶查，通通一句「無可疑」，仲好意思講「法證」？建議改由司徒法正擔綱主演好過啦，至少令人想起因果報應、冤魂索命。

觀眾寄情於公仔箱裏戲子在伸張正義，有型有款，轉頭睇新聞直播警察耀武揚威，或恐變愚民，或恐精神分裂。

我知我知，法醫不隸警隊。無論不隸屬警隊的法醫和隸屬警隊的鑑證科，我都想問問：你們專業已被一班學歷不高的同僚連累抹黑，成為全球笑柄，果然收order才開工，無order就翹埋手白拿薪水嗎？你們會不會主動提出要調查？

我也知道，《法證先鋒4》早在逆權運動前開拍，當時警察尚未算聲名狼藉。但一貫裝模作樣是大台劇風格──你幾時見過外國作品會如此生吞活剝專業術語對白，然後又慌死師奶唔明，解畫解到出腸的？所謂充足資料搜集，仰賴PPRB（警察公共關科），PPRB是個奇怪部門，主要功能在自己讚自己，兼逼人讚自己，所有拍攝警隊的題材，均要經過他們。於是你明白，點解香港影視一律唱好差佬？因為貪方便。轉過頭，《愛．回家》之類的OL和其他職業就無咁好彩，往往描繪成練精學懶，連導盲犬也被醜化。

欺善怕惡。

同樣服務市民，大台專業劇為什麼不拍套《清潔先鋒》？表揚吓清潔工的辛勞，疫情下裝備不足，走在前線，他們比包到冚的警察更忠誠勇毅。叫小生花旦拿掃把，自然過滿口化學名詞。

《法證先鋒》來到第四輯，演員大換血，劇情沒多交代上批角色去了哪裏。絃外之音，莫非暗示：亂世紛紛，有志氣不甘同流合污、不甘任由擺佈的法醫和專家公僕，都辭職不幹了？

誰還捧場呢？可能便是讀書不成廢青，易呃易氹，看完立志投考警隊，作威作福。反正一哥總捕頭，都承認咗係睇戲學咋。