**有彩蛋**謝安琪搣脂30磅轉「型」激戰Juno

leungping23 · 發表於 2019-4-4 12:01:45

產女後事業重新出發的「天后人妻」謝安琪（Kay），以8位數字加盟麥浚龍（Juno）公司後，轉走高檔型格路線，激減30磅，完美Body靚過未嫁時，在鬧市現身三分鐘都被仔(目及)足兩分半鐘，難怪連鍾情混血兒的Juno都要把她私有化，明醒自己孖住Kay拍激情MV。

42歲的Kay和張繼聰結婚後，現時育有11歲囝囝張瞻和2歲囡囡張靖，擁有幸福家庭的她，除產女時「停工」年多外，一直專注音樂事業，年多前被Juno收歸旗下，Kay在新公司的打造下，由「貼地女神」變成「型格天后」，主力出碟、開演唱會外，因形象獨特，成為各大服裝及護膚品牌的代言人，身價比未轉「型」前飆升一倍。

素顏一樣咁靚

屬完美主義的Kay，除了要工作表現超水準外，對自身亦要求高，因懷孕關係，體重曾達130磅，令本是34D Cup女神的她，上圍變得更為澎湃，但「卸貨」後簽了新公司，接納Juno的「提議」，憑無敵意志力用自然減肥法瘦身，狂跑步、做Gym、爬山及做瑜伽等，於一年來成功減去30磅肥膏，由於非靠藥物減磅，在零副作用下，瘦得更靚更自然。

最近忙於宣傳新歌《其實寂寞》的Kay，日前百忙中抽空單拖出巡中環處理私務，當日她零化妝、穿上貼身「激凸」黑色Deep V上衣襯百褶灰色長裙，打扮簡約，甚有品味。當她在馬路邊低頭狂撳電話等綠燈過馬路時，其艷光吸引到身邊一眾男途人向她投注目禮。期間遇上募捐的輪椅人士，愛心爆棚的她即慷慨解囊，才匆匆步入大廈，並逗留了個多小時才往取車返歸。

食足三餐運動瘦身

昨日Kay接受電話訪問時，被讚身材Fit爆，她說：「我依家磅數同未生女時差唔多，都係100磅度，不過生女後，我有做運動瘦身，做咗一年左右，每星期有三日做負重訓練，真係要舉重，多得健身教練指導我，可以重塑身形。自己平日一得閒就聽住歌咁跑步，但唔係跑得好快、好長嗰啲，感受吓做運動嘅樂趣。」至於飲食方面，她會食足三餐，間中獎勵自己飲咖啡、奶茶。

問到新工作安排？她稱和Juno有首合唱歌《暴烈˙34》，早前更拍了超激MV：「我同佢有一場好激烈嘅對手戲，就快會推出。」之前亦接拍了不少品牌廣告，而她最開心是其新歌《其實寂寞》反應好，登上各音樂平台流行榜的NO.1。