2019年不宜遊日？

botbotu · 發表於 2019-1-4 15:02:59

「蘋果震盪」觸發資金湧向日圓避險，令日圓再次爆升。日圓強勢帶出一個值得探討的消費課題：今年是否不宜遊日？

2020年東京搞奧運，各國遊客湧向日本，似乎明年才不宜遊日。但至少有三大訊號提醒大家，今年部署遊日都應該謹慎一些。第一個訊號係匯率問題，日本經濟實情一般，日本政府難以加息，照計日圓無乜動力上衝。但環球投資者睇穿日本政府唔加息同時亦無乜法寶壓低日圓，再加上催谷通貨膨脹此宏大目標已被輕輕放下，令日圓易升難跌。假如今年環球股市維持弱勢，日圓勢將向八算進發，遊日成本必然大增。

第二個訊號係消費稅，今年十月消費稅加碼到一成。雖然大家之前都習慣交8%消費稅，但去到一成就真係直達肉赤心理關口。特別係偏好住溫泉宿或特色旅館的朋友，一晚一個人閒閒地萬五、六Yen，一成消費稅就夠食幾餐B級美食。而且近年遊日人數屢創新高，賺慣錢的人氣溫泉宿亦未必會即時配合消費者提供額外折扣，換言之，這一成消費稅你很多時都要硬食，加上溫泉稅及越來越多大城市收取的住宿稅，遊日住宿交稅真係一闊三大。

第三個訊號係廉航危機，所講廉航，主要係指港航系統，近期港航財困消息不斷，雖然暫時未有風聲會摺埋，但港航系統中的快運，不少人都領教過大延誤及取消航班之苦。如果五行缺水，甩班風險必定大增。唔搭廉航又想直航，遊日就會貴上貴。

除了上述三大訊號，還不得不提一個「警號」，就係日本人對華人遊客的反感度已達到臨界點。近期只要係嘲笑中港台華人旅客膠事劣行的內容，幾乎都是中日大眾媒體及網媒的收視保證。在此趨勢下，既然大家都有心理準備今年經濟唔多掂越來越難撈，就係時候戒掉過去數年一年去幾次日本的習慣，留多幾個錢增加荷包安全感，或者少去日本，真係有望儲到部份首期呢。