藍絲們繼續盲撐政府吧！我就唔信第時仆街冇你哋份？政府一邊嗌無地，一邊將全港三百幾公頃黃金官地，補貼晒地價，比有錢佬做商業營運搵真銀！

iamboyboy · 發表於 2018-3-21 10:33:21

六問劉江華之點解又搵我哋笨？
￣￣￣￣￣￣￣￣￣￣￣￣￣￣￣￣
1）政府為何一邊高叫無地，一邊將全港三百幾公頃黃金官地，補貼晒地價，比有錢佬做商業營運搵真銀？政府以三分一優惠地價，換取8年後（2026年）呢堆有錢佬會所先至諗諗吓好似可能係唔知會唔會增加開放比公眾使用嘅時間（而家只有指定團隊可以用乍），係咪搵我哋笨？好多教堂、學校亦獲批三分一地價或只需交廉價地租，條件就係打開門為所有市民大眾服務，但政府點解大細超，比有錢佬做私人遊樂場兼錢搵錢，呢個政策公平咩？

2）香港遊艇會奇力島會址租約玩到2056年，仲長久過50年不變嘅香港，家陣奇力島會址係咪仲keep 住每年$1,000地租，畀有錢佬會員永續做私人會所？

3）推行私人遊樂場地契約「新」政策前，政府為何一推再推，延遲公布，同時偷偷幫有錢佬會所續期？私人遊樂場地契約由2014年開始檢討，檢討報告一拖4 年，係咪幫拖官商又勾結？

4）局長聲稱推動體育發展，但點解偏袒富豪會所，漠視精英運動培訓？某啲會所對香港體育普及化、精英化、盛事化三大政策方向毫無貢獻，例如香港遊艇會係玩遊艇、開船P，但政府就以推動體育之名，資助遊艇會用每年一千蚊地租、＄0地價，霸晒18,738 平方米嘅奇力島直至2056年；我哋嘅精英運動員，一無獎牌就降班無資助，如果政府真係關心體育發展，點解唔收返遊艇會市價地租，再拎去真金白銀資助運動員，永續體育培訓？退一萬步，政府粗粗哋收返遊艇會時市值地價，已經多3.6億（精英運動員每年開支約4.6億），講到咁撐運動員，最終咪又係最撐有錢佬。

5）政府話要比班有錢佬（係呀，包括有172公頃粉嶺高球場、賣緊千六萬公司會籍嘅香港哥爾夫球會）集資酬錢交新租地價，所以要延遲至2026年推行「新」政策，即係7成半私人遊樂場再續新租前，依然爽歪歪齊cap水，政府仲唔係擺明鬆章？市區重建呀，居民都無八年緩衝啦。政策早於2014年檢討，今年已經第五年，一個二個有錢會所都唔夠時間做準備？

6）收少三分二地價，物有所值嗎？庫房損失億億聲，換來只係將來每個月唔知會唔會多240小時畀合資格外界團體及體育總會代表隊（sorry，一般市民仲仍然無份，你而家無，將來都係無得玩）訓練時數，嘩，圍返埋，所謂開放鐘數，分分鐘貴過局長時薪，政府點解要作賤官地呢？

◤本土研究社要求◢
￣￣￣￣￣￣
1）對體育發展貢獻有限、圍威喂唔開放公眾嘅富貴會所，政府應盡快收回十足地價，為庫房止血，不願或不能交十足地價，就要取消會員制度，無差別對公眾全面開放。

2）對於不配合上述政策的會所，政府應運用《收回土地條例》，將會所收歸公用，開放畀公眾，並由政府接手營運，這更能貫徹政府體育政策嘅三項目標：普及化、精英化及盛事化，真正惠及公眾。

3）喂呀，取消私人遊樂場地契呢啲「體貼」富豪嘅特權政策，已經係社會共識，政府「土地大辯論」唔駛審都應該順應民意，還地於民啦！