鄭氏精英心態

kinsoncc · 發表於 2018-1-10 13:30:21

另一種的看法

鄭氏精英心態（陳也）

睇得推理小說多，自然對「鄭屋僭建」對號入座。僭建風波發展至今，令人覺得相當不對勁。哪個地方不對勁？推理迷發功，用晒排除法與消去法，最後得出，其實呢，鄭驊不同湯驊，前者無心戀戰，最好入閘甩轆，唔使掉進2.0的地獄廚房，做壞個招牌。
但奶媽不是省油的燈，一直鐵腕要人，鄭氏推辭N次，太唔俾面，結下樑子，奶媽記仇，點會吞得啖氣落。於是乎唯有夾硬接袁氏黑鑊，但留有僭建的確證，並且任由傳媒將風波無限發酵。事情去到這一步，又點會係盡快拆咗佢咁簡單埋尾！湯驊叫鄭驊將功補過，呵呵呵，等住接受二手委任的林定國追加一句「承諾下不為例都唔多適當」！唱雙簧歡送。鄭驊位未坐暖，早走早着，真正「求仁得仁」，對燒到埋身的一地兩檢，閃腰避過。
若然推理屬實，鄭驊無疑高湯驊幾級段數，絕不覬覦袁氏留下的蘇州屎位，一不做，二不柒！將來一做就做阿一！此鄭也不同彼鄭，不認同窮36年做官做到退休到英國陪仔養老的心態，此鄭氏，正正就是彼鄭氏口中的「精英心態」！
推理至此，心水清讀者觀察鄭驊的甜笑，跟當年丟官的苦瓜乾梁錦松一比，完勝。