轉載 : 出現這5個徵兆，男士要盡快去睇醫生

makgavina · 發表於 2017-2-2 13:58:34

轉載 : 出現這5個徵兆，男士要盡快去睇醫生

當講到性功能或丁丁有咩問題嗰陣，男士們通常都會諱疾忌醫，收收埋埋避免人哋知佢有問題。但所謂「病向淺中醫」，其實拖落去只會令問題惡化，到最後挽救唔到就真係喊都喊唔返！

留意以下所講嘅5大徵兆，如果中咗就好大可能反映你嘅丁丁出現毛病。都係嗰句，快啲睇醫生啊！

1. 龜頭表皮變得緊繃
如果你感覺到龜頭有緊繃嘅感覺，或者出現白色斑點，即使無痛楚，你都好可能有「硬化性苔癬」，起因係荷爾蒙或免疫系統失調。無割包皮或者小便時候要用力嘅人就要加倍留意，嚴重嘅話可以引致癌症或者尿道閉塞！

2. 出現硬皮／粗糙
如果你嘅性愛頻率頻密，丁丁出現硬皮或者粗糙皮膚嘅情況就好常見。但假如你唔覺得痛或者特別敏感，又或者有一段時間無做愛都出現硬皮嘅話，你就好可能患上陰莖癌！如果及早發現仲有治療嘅辦法，但如果拖得耐，就要切咗丁丁先可以醫好！雖然呢個病常見於70歲或以上嘅男性，但假如有咩症狀最好都係即刻去check吓。

3. 注意彎度
如果你留意到丁丁出現嚴重異常嘅彎曲，你就可能患有佩羅尼氏病（纖維性海綿體炎）。雖然呢個病嘅主要成因不明，但根據英國國民保健署（NHS）所指，當丁丁勃起後受外力整傷後比較容易出現呢個情況。如果由得佢唔理，有機會會導致更劇烈嘅彎曲、做愛時感到疼痛，甚至係……整根丁丁斷裂！

4. 出現腫塊
雖然睪丸癌只係佔男性癌症嘅百分之一，但都唔代表完全無可能發生，根據NHS嘅數據，呢個病最常發生喺15-49歲男士身上。最明顯嘅病徵就係睪丸上出現硬身但唔痛嘅腫塊。如果及早及現，呢個病有百分之99都係可以治癒嘅，所以最好每個月都好好檢查一吓你嘅蛋蛋有無出現異常喇！

5. 血尿
如果尿液帶血就可能係代表前列腺腫脹或者有腎石，但更嚴重嘅情況係代表患上癌症！
唔怕口臭咁講多次，如果出現以上任何一種情況，一定要盡快、盡快、盡快預約睇醫生啊！