建橋拖拖拉拉 詭辯自暴其醜

sadsam169

港珠澳大橋貴為國家級重點基建工程，點知因為香港段延誤拖後腿，搞到珠海及澳門要「等埋香港」至通車，至於「等到幾時」，路政署喺本報再三追問下，首次披露工程進度，但係就故弄玄虛，大玩語言偽術，冇蠱惑至奇！

即係咁，大橋內地段進展順利，捷報頻傳，而澳門段亦按部就班，淨係得香港段問題多多，一拖再拖，本報記者日前到大橋工地視察所見，原本今年啟用嘅香港口岸人工島仍然係一片黃土，人工島對外連接嘅交通命脈，屯門至赤鱲角連接路工程連鐵都未紮好，至於全長十二公里嘅香港接線，更十足十斷截禾蟲咁款，官老爺之前所謂明年如期通車，睇怕都係得個噏字。

有見本報報道引起公眾關注，當局拖無可拖之下，終於回覆本報，話以累積工程費相對合約金額百分比計算，香港接線完成七成四，口岸人工島填海工程完成八成八，包括旅檢大樓在內嘅基礎設施工程完成兩成六，至於屯門至赤鱲角連接路南北兩段，就分別完成四成二及三成六咁話，但對於工程幾時完成就隻字不提。

呢嗱嗱嗱，官老爺語言偽術就係咁嘅嘞，有理冇理羅列一大堆數字同專業名詞，係要聽到你一頭霧水為止。實情係資金用咗幾多，同工程完成咗幾多唔能夠畫等號，有可能工程做得好少，但因為物料貴令造價增加。實際上，大橋工程喺隧道挖掘、填海及旅檢大樓興建工程等面臨多項不明朗因素，工期「抿水」到不得了，當局提供嘅百分比擺明有誤導之嫌。

正如古人話齋︰「巧言令色鮮矣仁。」官老爺遮遮掩掩，顧左右而言他，肯定有難言之隱，否則嘅話，點解唔可以直接列出各項工程完成百分比？點都好喇，當局挖空心思整靚盤數，睇怕都係枉費心機嘅咋。醜媳婦終須見家翁，如果到明年內地段同澳門段順利完工，而香港段就繼續拖拉，繼續拖人哋後腿，咁就真係羞家嘞。

真係諗起都唏噓，以前「香港速度」係效率嘅代名詞，亦係內地同澳門嘅學習榜樣，家陣時移勢易，「香港速度」畀「中國速度」甚至「澳門速度」爬頭，除咗港珠澳大橋，高鐵、西九文化區……冇一樣唔係延誤復延誤，超支復超支。香港之所以搞成咁，成個社會淨係掛住政治鬥爭，一味內鬥內耗，政客搞風搞雨，固然難辭其咎，港府弱勢無能，官僚胡混度日，更加係罪魁禍首。

諗諗吓，無良政客拉布成風，搞到連國際機構都調低本港主權評級展望；其實相比起港府基建「拉布」，唔單止令香港競爭力低下，仲拖累埋成個國家，小巫見大巫喇！

artlo

関的政客春事咩, 个扑街政府有古怪就真.

tomyhk141

官僚胡混過日子!在其位而不思其政!自97以來，未見官員問責辭職!

巴魯坦星人

大家都有眼見....
政府係同一時間係全香港九龍新界都搞大基建大工程, 又令民間數不盡戰前戰後樓宇搞維修, 又撥款各區搞吓小工程....  加上一般基建維修, 同一時間又點得咁多人手..... ??

你幾大食, 一日頂多食十碗八碗飯
佢就講為你好, 一次過用曬手上白米
一次過煲成千碗飯放係你面前叫你去食.....


咁, 盡食都可以....... 你比咩好處過我先

谷村富郎

無論是什麽原因造成香港競爭力和行政效率低下都好,反正又一次証明了:
香港的多党政治制度之下,其立法乃拖死行政的罪魁禍首,是劣於澳門和大陸的政治制度的,這和現今台式民生政治同一樣之死法。

勞高喜

回復 谷村富郎 #5 的帖子


不宜囫圇吞棗式論政制利弊
香港今日困句不盡緣於政制不善
而在於人心思變而應變無方所致
舉例內地肅貪運動 雷厲風行 劍及履及
在投鼠忌器的有限條件下幹最大可能的事
僅此而已 人心已大快 掌聲已連綿
但切不可因而判定中央集權為絶對優越
體察民心 善觀民心 順應民心 才是王道

超能仔

肥黎外国黑金養了班犯民，拉布，阻撥欵，又搞司法覆核，阻發展下的結果！