|
|
樓主 |
發表於 2016-12-6 23:10:23
|
顯示全部樓層
【來自石澳的王子 - 黃梓浩望以雙腿證明自己】
青山、綠水、足球，陪伴著石澳港超腳黃梓浩成長，呢名來自港島東南部一條小村落嘅「王子」，雖未有機會見證過上世紀九十年代香港球圈嘅「東方王朝」，卻係呢支經歷過高山低谷嘅球隊與「王朝傳奇」李健和、羅繼華一齊奮戰過，並且被對方嘅拚搏態度所感染，冀走出石澳、係職業足球世界以一雙腿證明自己。
位處港島東南部嘅石澳，與市區僅靠一條依山而修、彎多路窄嘅石澳道相連，寧靜嘅小村比人與世隔絕嘅感覺，頗有世外桃源嘅韻味，黎自石澳村、 綽號「王子」嘅黃梓浩就係呢度長大，佢唔似寂寞星球嘅小王子一樣只有一株玫瑰花相陪，而係有足球、大海為陪，小學時就與鄰居係村校嘅荒地，或者係石澳海灘踢波，踢夠就係海中暢泳，一身黝黑嘅膚色就係由此而黎。
「細個係沙灘踢波，唔怕跌倒就練倒掛金鉤，大家將拖鞋插係沙地做門柱就有龍門，界線都無嘅，大家隨意踢，踢夠就去游水。」小學三年級開始接觸足球，黃梓浩好快就愛上呢項運動，之後參與足總嘅暑期青少年推廣，自此過住每次訓練、比賽都要翻山越嶺出市區嘅生涯。「讀書時可能比較辛苦，既要帶書包又要帶著波衫波鞋，慢慢習慣左。近年試過係屯門湖山踢預備組，完場後立即要趕去港島坐12點嘅尾班車番石澳，趕唔到只能坐的士，但我唔覺得辛苦。」相比起好多隊友，黃梓浩為左踢足球而花係交通嘅時間更多，但喜歡石澳寧靜環境嘅佢從無諗過離開呢條小村。「羨慕隊友住係市區？或者係人地羨慕我住石澳呢。」
原先效力南華青年軍嘅佢，係同學謝朗軒介紹下轉投東方青年軍，獲教練李健和、羅繼華安排參與丙組聯賽，同其他青年隊員及東方一眾名宿協助球隊升上頂級聯賽，94年出生嘅佢無緣見證昔日東方王朝嘅盛世，但從名宿身上睇到昔日球星風采。「我跟東方一步一步升上去，係前輩身上學到好多。」黃梓浩印象最深嘅係李、羅兩人言傳身教，特別係兩人係場上鬥志更令佢難忘：「記得有場比賽已經踢到九十幾分鐘，但李SIR仍然追落去底線出波，看到佢咁搏命，除左尊敬之外，都覺得只有十幾歲嘅自己無理由要落後於四十多歲嘅佢地，而當時已開始考慮以足球為事業，所以更努力向佢地學習。」
自小已經係香港各級青少年代表隊成員嘅黃梓浩，一直抱住「代表香港就唔想輸」嘅想法，到成為職業球員後再著上代表隊球衣就更加想贏，偏偏第一次為大港腳踢國際賽就留下唔愉快嘅經歷。「六月到緬甸踢比賽，對緬甸一戰我有份上陣，表現唔係太好，但我唔認為係自己技不如人，但因為緊張而表現慌失失。」表現與期望有落差，佢話多少都有受到打擊，但既然發現自己未夠好，就要更努力爭取下一次大港腳嘅機會，幸運地，今季由東方龍獅外借理文流浪，佢遇上同佢同樣能翼能衛嘅前輩——張健峰。
「張健峰由南華外借到理文流浪一、兩個星期後，我已經得益唔少，訓練每完成一部分，佢都會跟我討論、分享經驗，有呢種前輩帶住我覺得好開心，希望今季我可以係張峰身上學習，學到佢嘅傳中球技術就好。」個性有少少怕羞、講野唔多嘅佢，更渴望以一雙腿黎證明自己，而唔係空口說白話。「香港隊左路人選唔算多，希望將來我有能力去競爭位置。」
或者，來自石澳嘅「王子」，總有一日能夠成為香港隊嘅「王子」。
-理文流浪 本週賽程-
理文流浪 vs 九巴元朗
12月11日下午5點半 青衣運動場
|
|
樓主: man36951
在線雷達
發表於 2016-12-4 00:33:26
